Een slechte tied.
Mien va en moe hebt in 1938 een boete mit een half bunder grond kocht an de Jeulnwieke ze hadden inmiddels 3 kiender en daorveur woonden ze in een hiel old huus an de Reinder van Oostenswieke en meestal warkte mien va bij een boer mar as die gien wark meer hadde dan waren ze anwezen op de warkverschaffing nou en dat was gien vetpot.
Ondanks dat de tied slecht was zag mien Va toch nog kaans um veur de boete een stenen veurhuus te laoten zetten kiek en dat was een hele verbetering wat de kolde betreft en ie hadden nou twee slaopkamers want de boete die lekte en die tochte de schotteldoek bevreur oew op de taofel en vlak na de oorlog is de boete er achter weg breuken en is daor ok een steenn achterhuus achter zet mit twee varkenhokken en ruumte veur een paar geiten.Toen as thuus eenmaol klaor was bint er geuten anzet en kunn wij oons eigen water opvangnn in de regenbak kiek dan wai niet meer zo ofhankelijk van de wieke want nou mus ie altied achtgeem as de melkbok der ok ankwaamp want dan mus ie veurtied nog gauw een ummer water iet de wieke putten want as de melkbok er éénmaol langes was kun ie de eerste uren het water niet gebruuken zo troebel was het dan mar ok bij de winterdag as het flink vreur mus ie er veur zorgen dat de biete los bleef. En dat mus soms wel vaker op een dag gebeurn, want bij wat strenge vorst vreur die zo weer dichte.
Op 4 Meert 1941 was het zowiet mien Va bleef bij huus want mien Moe was niet in orde, het vreur nog streng en de blomm gung de hiele dag niet van de roeten of want dubbel glas daor hadden ze jao nog nooit van heurt en wij hadden meuite um het een beetie aangenaam in huus te holn want wij stookten toen ja nog mit turf. De buurman wol wel eem op de fietse naor de vroedvrouwe dat was zowat een half uure fietsen dus dat kun nog wel eem duurn veur asse der was mar in de loop van de dag kwaamp de vroedvrouwe en toen wast toch effen schrikken want ze hadden rekent op ééne en toen waren het er twee, twee flinke gezonde jongens.
Mar eerst nog eem trogge naor 1940 want op de 10e Mei brak de oorlog uut, veur oons as kiender veraanderde er niet veule ik was toen 5 jaor en dan heb ie er jao gien benul van wat een oorlog betekend ie ziet natuurlijk wel dat oen olders bange bint mar ie begriept niet dat as meensen die mekaar niet kent en mekaar ok nog nooit eziene hebt dat die mekaar dood schiet, mar ai dan een paar jaor wieder bint en oen Va is er ’s aovens met ’t eten niet dan vraog ie wel an oen Moe waor blif mien Va toch en oen moe zeg dan dat hij mut onderduuken want de duutsers wilt alle jonge keerls an ’t wark hebben um in duutslaand kanonnen te maken, mar umdat mien Va een gezin hadde mit drei kiender en mien moe kreeg ok nog weer een poppie daorumme hoefde mien Va niet naor duutslaand mar mus hij hier veur de duutsers warken, hij mus um melden in Haovelte daor hadden de duutsers een vliegveld en dat worde geregeld bombardeerd en dan mussen een stel kerels er veur zorng dat ze dat vliegveld kunnen blieven gebruuken.
Slim kold
Het was nog veur in Meert toen de tweeling gebooren worde en het was nog volop winter de wieken lagen nog dichte vreurn en wij waarn ok nog an ’t schaatsen mar mien Va en Moe hadden wel wat aanders an de kop as schaatsen, de tweeling dat waarn dus twee jongens die mussen een naame hebben dus daor mus aover nao udacht worden en umdat het mien Moe zien beurte was en heur moe was nog niet benuumd mar die heete Femmigje en het mus een jongesname worden die daor op leek toen hebt ze mar keuzen veur Frederik [Freek} mar er was er nog iene en dat was dus mien Va zien kaante weer nou daor doei dan niet moeilijk aover dan beneum ie toch gewoon oen breur en zo worde dat dus Karst. Mar de tied worde slechter de Duitsers waarn baos de boel worde schaars en alles kwaamp op de bon en ok kwamen de duutsers regelmaoteg de wieke of vaake mit een bokkie en dan naam ze alles in beslag wat ze kunn gebruuken zoas fietsen en vee mar ok de enkeling die nog een radio hadde mus die inlevern mar honger lieden zoas in de grote steden hoefden wij niet want wij verbouwden alles zulf zoas eerappels gruunte en broene boonen ok hadde wij een paar geiten veur de melk en in ’t veurjaors kochte mien Va altied twee biggen veur de slacht de eerste worde in de harft slacht en dan nog iene in ’t veurjaor dus broene boon mit spek was veur oons dagelijkse kost en een goeie Toggenburger melkgeite gaf gemiddeld 4 liter melk per dag en er scharrelde ok altied wel een koppeltie kiepen umme ‘huus dus wij kreeng ok nog wel ies een eitje. En brood bakken dat dee mien moe ok zulf gewoon in een groot bakblik in de oven van de fornuuskachel want de kachel die braande jao de hiele dag um ‘t huus warm te holden.
